Живееме во време, во кое вистината често се заменува со една нејзина нереална, дигитална верзија, која создава погрешна слика, убава за очите, но тажна за срцето.
Денес е многу лесно и едноставно да се сокриеме зад совршен Фејсбук и Инстаграм филтер, или зад одлично уредено Тик Ток видео. Многумина го прикажуваат најдоброто од себе, избирајќи совршен агол, засилени бои и алатки кои го прикриваат уморот, подочниците и разните несовршености, а тоа подразбира часови поминати во уредување на сопствениот живот, со цел да се добие одобрување од светот, во форма на лајкови и коментари.
Насмевката не изостанува, иако можеби зад неа се крие скршеност, тага, разочарување, осаменост и стрес. И додека светот го сака нашето совршено лице, измазнето и блескаво од разните филтри, кои ја сокриваат ранливоста, постои Некој, Кој го сака нашето срце и Кој ја гледа секоја наша пукнатина и секоја скриена солза. Тој не љуби во сета наша несовршеност и ни вели:
„Дојдете кај Мене сите вие кои сте изморени и натоварени со тешки бремиња, Јас ќе ве одморам!“ – Maтеј 11:28
Тој, Кој не засака во нашата најлоша верзија и сака да направи најдобра верзија од нас е Господ Исус Христос. Пред Него нема докажувања, ниту глума. Тој бара од нас искрено срце, кое љуби, ја сака нашата уникатност и зависност само од Него. Неговата благодат е нашиот најголем украс. Кога Тој престојува на престолот на нашиот живот, тогаш сме најубави, бидејќи сме искрено радосни, духовно исполнети, а тоа не може да се сокрие. Едноставно, срцето не може да се филтрира, тоа најгласно зборува, а кога срцето Господ го менува, тоа се гледа и се чувствува. Лажните претстави за совршенство се заменуваат со увереноста дека Бог не љуби и не прифаќа и кога немаме шминка на лицето и кога нашата коса е седа.
Прекрасно е кога се трудиме да му угодиме на Бога, а не на светот, кога времето, наместо за филтрирање и разубавување на социјалните мрежи, го минуваме во молитва или пак во дружење со луѓето, кои ни се радуваат и не сакаат. Божјата љубов, ја исполнува секоја наша пукнатина, а кога ќе ја исполни, тогаш тие пукнатини, кои некогаш биле симбол на болка и пораз, преку Христа стануваат сведоштво за нашето исцеление и победа, но и за нашата автентичност, за која не се потребни филтри.
Маја Јовевска
