Џон Лејк, харизматичниот проповедник и мисионер кој се вбројува меѓу најзначајните фигури на раното пентекостално движење, оставил длабока трага во историјата на христијанството.
Роден е во 1870 год во Онтарио, Канада, во големо семејство со 16 деца, од кои половина починале млади, што го обликувало неговиот став кон болеста и смртта.
Како млад се преселил во САД, каде работел како градежник, издавач и агент за недвижности, а подоцна и во бизнис со осигурување.
Во текот на годините неговата сопруга и блиски роднини страдале од сериозни болести, но биле исцелени преку молитви во служба на Џон Александер Дауи, што силно го убедило во Божјата сила за исцелување.
Во 1907 се приклучил на пентекосталното движење по влијанието на Чарлс Пархам и станал духовно подготвен за мисионерска работа.
Неговата служба била исполнета со молитви за исцелување, проповеди за силата на Светиот Дух и мисионерска работа што ја вршел со непоколеблива вера.
Фото: afm-ags.org
Во периодот од 1908 до 1913 година тој дејствувал во Јужна Африка, каде што не само што помогнал во основањето на Апостолската мисија на верата – деноминација која денес е една од најголемите пентекостални цркви во регионот – туку и се соочил со еден од најстрашните предизвици на своето време: епидемијата на бубонска чума. Додека многумина бегале од заразата, Лејк останал меѓу болните, молејќи се за нив, погребувајќи ги починатите и сведочејќи за верата што ја сметал за единствена заштита.
Англија испратила како помош екипа на лекари и медицински материјали, а тие со неверување го гледале како работи во такви услови и успева да остане здрав. Лејк им одговорил со стихот од Римјаните 8:2.
Зашто законот на Духот на животот во Христа Исуса ме ослободи од законот на гревот и смртта.
Уверувајќи ги дека Божјата светлина и верата го штитат од секоја болест. За да ја потврди својата изјава, предложил експеримент: докторите земале примерок од пена од белите дробови на починат од чума, под микроскоп бактериите сеуште биле живи, но кога истата материја ја ставиле во неговата рака, клетките веднаш умреле. Ова сведоштво, пренесувано низ генерации, останува симбол на неговата непоколеблива вера во Господ Исус Христос, која носи сила, заштита и исцеление. Неговата служба не само што инспирирала илјадници луѓе во Јужна Африка да поверуваат во Господ Исус Христос, туку и поставила темели за ширење на пентекосталното христијанство низ целиот свет. Тоа е наследство кое и денес се смета за клучно во развојот на духовното движење што ја нагласува силата на верата, преобразувањето преку Христос и живото присуство на Светиот Дух.
Фото: afm-ags.org
По мисионерската работа во Јужна Африка, каде што основал над 600 цркви и ја поставил Апостолската мисија на верата како темел на пентекосталното движење во регионот, Лејк се вратил во САД и во Спокан, Вашингтон, основал познатите Healing Rooms. Тие станале центар за молитви и исцелувања, со илјадници сведоштва за луѓе кои биле излекувани, што му донело на градот репутација како „најздрав град во Америка“. Неговата служба била карактеризирана со силна вера во Божјата моќ да преобразува животи, со акцент на крштевањето во Светиот Дух и практиката на говорење на јазици како духовен дар. Лејк не само што проповедал, туку и обучувал други да се молат за болните, создавајќи генерации служители кои го пренесувале неговото учење. Влијанието врз харизматското движење се гледа во тоа што неговите проповеди, книги и памфлети продолжиле да се ширaт и по неговата смрт во 1935 година, инспирирајќи нови генерации верници и проповедници. Харизматското движење, кое се развило во втората половина на 20 век, ја презело неговата нагласена вера во чудесното делување на Светиот Дух, во даровите на исцелување и пророштво, и во молитвата како средство за духовна трансформација. Многу современи харизматски цркви и служби директно се повикуваат на неговото наследство, а неговите Healing Rooms се реплицирани во различни делови од светот како модел за практична служба на исцелување.
„Содржината е базирана на јавно достапни онлајн информации, со авторска обработка и интерпретација”
Подготви: Тимот на Портал Благодат
