Во време кога секојдневието носи ,,бранови” што знаат да нè расклатат, прашањето е каде гледаме тогаш и каде е нашиот фокус?
- На стравовите?
- На грижите?
- На проблемите?
- На она што ни недостига?
- Или на Оној кој што нè повикува да продолжиме?
Го спроведува ли верникот авторитетот што Бог му го дал, како одговорност, за да остане цврст и непоколеблив пред сите околности и предизвици, што се обидуваат да ја потонат неговата вера?
Токму на оваа тема: ,,Живеј со Божјиот авторитет – за пробив, заштита и победа”, Епископ Константин Кајшаров, зборуваше на Богослужбата во саботата, пред верниците во ХЦ Блага Вест во РМ. Пораката од проповедта беше јасна – повик за акција, повик да се дејствува со Божјиот авторитет!
Но, за да може човек да дејствува со авторитет, најпрвин е потребно да биде под авторитет. Тоа значи Исус да биде издигнат над сè, за потоа од таа позиција на потчинетост кон Бога, да дејствува и да го спроведува Божјиот авторитет, во името на Исус.
Богослужбата продолжи со Господова Спомен Вечера, во радост и благодарност, со издигање и славење на Исусовото име.
А за крај, печатот од пораката остана да пулсира во срцата на верниците – Божјиот авторитет не е само даден, туку е нешто што секој верник е повикан да го живее и спроведува.
